الكوفية لازم يطلع رئيس الوزراء يعتذر للناس، يقلهم متأسف حقكم على راسي، أنا فشلت فشل ذريع، مش بس شاطر يسكروله مفارق الطرق لما بيمر موكبه لأنه رئيس وزراء, ولما بتصير أزمة ببطل حد يشوفه أو يسمع منه وبصير الحق على إسرائيل، يا رئيس وزراء على طول يا مش رئيس وزراء على طول.

لازم يطلع يعتذر وزير المالية للناس، ويقلهم متأسف أنا فشلت، صحيح حبيت أصير وزير بس القصة طلعت كتير أصعب ما توقعت.

لازم يطلع يعتذر رئيس هيئة البترول للناس، ويقلهم متأسف أنا فشلت فشل ذريع، بس شو بدي أقلكم، سكين بحلقي، إن حكيت بنفضح، وإن سكتت بنفضح.

لازم يطلع الرئيس ويعتذر للناس، ويقلهم متأسف فشلت فشل ذريع، أوسلو وواي ريفير وأنا بوليس والخليل1 والخليل 2، وباريس الإقتصادية، وكلشي وقعناه طلع على راسنا، هيهم شوي صغيرة رح يرعوا غنامتهم المستوطنين في المقاطعة ومش رح يسترجي حد يقلهم وينكم، بالآخر أنا زييي زيكم مواطن تحت الإحتلال بس مع مزايا رئيس.

اعتذروا للناس، للعمال الي حرمتوهم نقابة قوية تحمي حقوقهم في الداخل، للطلاب حرمتوهم من أحسن شي كان بفلسطين وهو التعليم، للمرضى بطلو يلاقو علاجات سرطان وكلى وقلب وسكري، للأرامل والأمهات بيستنو رحمة المحاكم الشرعية مشان شوية نفقة، للمزارعين بطل عندهم مي ولا أراضي ولا سوق، للشباب صار حلمهم فيزا وهروب برة البلد، للقطاع الخاص حلبتوه وهلكتوه وفقرتوه ومصيته دمه بدون نتيجة، للعائلة الفلسطينية بتدفع أغلى ثمن كهرباء وماء وطعام ولحوم وإنترنت وخبز وأجرة بيت ومحروقات مقارنة بمتوسط الدخل في الشرق الأوسط كله.

اعتذروا لأنه إنتو صفيته أخطر عامل وأكبر عامل لتهجير الناس من الإحتلال نفسه.

إعتذروا لأسر الشهداء بهدلتوهم وقليتو قيمتهم على فتات، اعتذروا لشعبنا بكل مكان لأنه إنتو همكم اتضلكم مسؤولين ولو على حساب يبطل في بلد...

وأكثر حد غلطان هو الي بيقلك حد الله المسؤولين عارفين شو بدهم، لا يا صاحبي، عارفين منيح وشايفين منيح وفاهمين منيح، وبالعكس ناجحين نجاح مبهر، بس الفرق إنه إنت شو بتتوقع هدفهم، وهما بالأساس شو هدفهم، ها هدفهم يضلهم مسؤولين فوق رقابنا، وهيهم ناجيحن نجاح مبهر.